“Neftçi”, yoxsa “Qarabağ”?
Azərbaycanın milli futbol çempionatının bitməsinə 5 tur qalır. Yüksək liqada birincilik uğrunda əsas mübarizə iki komanda – Bakının “Neftçi” və Ağdamın “Qarabağ” klubları arasında gedir. Liderliyi bölüşən bu komandaların hər birinin 51 xal var. Həm “Neftçi”, həm də “Qarabağ” 15 qələbə əldə edib. “Qarabağ” rəqib qapılarına 49, “Neftçi” 41 top vurub. Ağdamlılarda top fərqi +30, bakılılarda +24-dür.
Şəxsi oyunlardakı göstəricilər əsas götürüldüyündən ilk sırada “Neftçi” qərarlaşıb. Üç oyunun birində bakılılar 3:1 hesabı ilə qalib gəlib, digər iki görüş isə heç-heçə (1:1) başa çatıb. Komandaların dördüncü görüşü sonuncu tura təyin olunub.
Novator.az bildirir ki, Professional Futbol Liqasının təsdiqlədiyi əsasnaməyə görə, sonda xallar eyni olarsa, çempion şəxsi görüşlərin nəticələri əsasında müəyyənləşir.
Digər meyarlar bunlardır: komandaların öz aralarında keçirdikləri oyunlarda top fərqi; mövsüm ərzində ən çox qələbə qazanmış komanda; bütün oyunlarda vurulmuş və buraxılmış topların fərqi; bütün görüşlərdə vurulmuş topların sayı.
Bütün göstəricilər bərabər olsa, ən az qayda pozuntusuna yol vermiş komanda çempionluq qazanır. Sarı kart 1 bal, qırmızı kart 3 baldır.
Qalibi müəyyən etməyə bu da yetməsə, püşk atılır.
Azərbaycanın milli futbol çempionatı 1992-ci ildən keçirilir. İndiyədək 8 dəfə “Neftçi”, 6 dəfə “Qarabağ” çempion olub.
“Kəpəz”in 3, “Şəmkir”, “Bakı” və “İnter”in 2, “Turan” və “Xəzər Lənkəran”ın 1 çempionluğu var.
