Komandan bayrağı
Prezident İlham Əliyev fərman imzalayaraq ali baş komandanın bayrağı haqqında əsasnaməni və bayrağın təsvirini təsdiqləyib. Novator.az bildirir ki, əsasnaməyə görə, ali baş komandanın bayrağı Azərbaycan prezidentinin rəsmi hərbi simvoludur.
Ali baş komandanın bayrağı 3 növdə hazırlanır: etalon (bayrağın orijinalı) – dövlət başçısının Prezident Sarayında yerləşən xidməti otağında saxlanır; dublikat (bayrağın surəti) – prezidentin ali baş komandan kimi iştirak etdiyi rəsmi tədbirlərin və digər mərasimlərin keçirilməsi zamanı və o, Azərbaycan Silahlı Qüvvələrinin struktur qurumlarına gəldikdə həmin tədbirin keçirildiyi binanın üzərində, olduğu gəmidə və ya həmin tədbir üçün nəzərdə tutulan salonda (otaqda) qaldırılır (asılır) və ya yerləşdirilir; kiçildilmiş ölçülü dublikat (nəqliyyat üçün) – prezidentin ali baş komandan kimi səfərləri zamanı nəqliyyat vasitəsində quraşdırıla bilər.
Ali baş komandanın bayrağı dövlət bayrağının təsvirinə tam uyğun şəkildə, ikiüzlü qumaşdan hazırlanır və eninin uzunluğuna nisbəti 1:2-dir.
Bayrağın hər iki üzünün ortasında ali baş komandanın emblemi təsvir edilib. Emblem tiyələri yuxarı yönəlmiş çarpazlaşdırılmış qılıncların iti ucları arasında yerləşən dövlət gerbinin təsvirindən ibarətdir.
