İşıq güzəştində yenilik
Prezident İlham Əliyev sahibkarların tikinti obyektlərinin elektrik enerjisi ilə təchizatına yönəlmiş fərman imzalayıb. Novator.az bildirir ki, fərmanla mövcud və ya inşa ediləcək tikinti obyektlərinin elektrik enerjisi (gücü) alması üçün texniki şərtlərin, layihə-smeta sənədlərinin hazırlanması və verilməsi, habelə enerji təchizatı şəbəkəsinə qoşulması qaydası yenilənib.
Yeniliyə əsasən, sifarişçinin tikinti obyektinin enerji təchizatı şəbəkəsinə qoşulması 20 gündən gec olmayaraq təmin edilməlidir. Bunun üçün iki mərhələ tələb olunur: sifarişçinin kiçik və orta biznes evlərinə və ya mərkəzlərə müraciəti, qoşulma haqqının ödənilməsi, texniki şərtlərin, layihə sənədlərinin hazırlanması; tikinti-quraşdırma işlərinin aparılması və enerji təchizatı şəbəkəsinə fiziki qoşulma, tikinti obyektinə elektrik enerjisinin verilməsi, texniki şərtlərin və layihə sənədlərinin təqdim edilməsi, enerji təchizatı müəssisəsi ilə sifarişçi arasında qoşulma aktının və elektrik enerjisinin alğı-satqı müqaviləsinin imzalanması.
Qoşulma haqqının məbləğlərini Nazirlər Kabineti müəyyən edir. Sifarişçinin tikinti obyektinin enerji təchizatı şəbəkəsinə qoşulmasının 20 gün müddətində və daha az müddətdə həyata keçirilməsinə görə fərqli məbləğlər təyin olunur.
