Assanj həbs edildi
Böyük Britaniya polisi aprelin 11-i Londonda Wikileaks.org (“Vikiliks”) saytının yaradıcısı, Avstraliya vətəndaşı Culian Assanjı həbs edib.
“Vikiliks” saytı 2010-cu ildə ABŞ Dövlət Departamentinin məxfi sənədlərini dərc edib. ABŞ-da buna görə 1971-ci il təvəllüdlü Culian Assanja casusluq ittihamı verilib. Jurnalist təqiblərdən yaxa qurtarmaq üçün İsveçə gedib. Burada zorlama cinayətində şübhəli bilinən Culian Assanj 2010-cu ildə Londonda tutulub, girov müqabilində azadlığa buraxılıb.
2011-ci ildə Böyük Britaniyada məhkəmə onun İsveçə təhvil verilməsi haqda qərar çıxarıb, bu iş 2012-ci ilin iyun ayınadək uzanıb. Culian Assanj iyunun 19-da Ekvadorun Londondakı səfirliyinə sığınıb.
Bu yaxınlarda Ekvador hökuməti siyasi sığınacağın başa çatdığını bəyan edib və Culian Assanjın səfirlikdən çıxmasını istəyib. “Vikiliks”in məlumatına görə, Culian Assanj səfirlikdən çıxmayıb, polis Ekvadorun Londondakı səfirinin dəvəti ilə diplomatik nümayəndəliyə gələrək onu tutub.
2017-ci ildən Ekvadorda prezident postunu solçu Lenin Moreno tutur. O, Rusiyada 1917-ci ildə baş vermiş bolşevik inqilabının lideri, sovet imperiyasının qurucusu Vladimir Leninin (Ulyanov) adını daşıyır. Culian Assanjın sığınacaqdan məhrum edilməsi onun qərarıdır.
