Klub turnirlərinin təqvimi
Novator.az UEFA-nın klub turnirlərinin 2019-2020-ci illər mövsümü üzrə təqviminə nəzər salıb.
Çempionlar Liqasının təsnifat raunduna Cəbəllütariq, Andorra, San Marino və Kosovo çempionları qatılır. Bu mərhələnin yarımfinal görüşləri iyunun 25-nə, final oyunu iyunun 28-nə təyin olunub.
9-17 iyul arasında keçiriləcək birinci mərhələyə İsrail, Kipr, Rumıniya, Polşa, İsveç, Azərbaycan, Bolqarıstan, Serbiya, Şotlandiya, Belarus, Qazaxıstan, Norveç, Sloveniya, Slovakiya, Moldova, Albaniya, İslandiya, Macarıstan, Şimali Makedoniya, Finlandiya, İrlandiya, Bosniya, Latviya, Estoniya, Litva, Monteneqro, Gürcüstan, Ermənistan, Malta, Lüksemburq, Şimali İrlandiya, Uels, Farer adaları çempionları buraxılır.
İkinci mərhələdə (23-31 iyul) yarışa Yunanıstan, Xorvatiya, Danimarka çempionları, Türkiyə, Avstriya, İsveçrə, Çexiya, Hollandiya, Yunanıstan çempionatlarında ikinci yeri tutan komandalar qoşulur.
Çexiya və Hollandiya çempionları, Fransa və Rusiya çempionatlarında 3-cü yeri, Portuqaliya, Ukrayna, Belçika çempionatlarında 2-ci yeri tutan komandalar turnirə üçüncü mərhələdən (6-13 avqust) başlayır.
Dördüncü – sonuncu ələmə mərhələsində (20-28 avqust) Avstriya və İsveçrə çempionları yer alır.
Qrup raundu 17 sentyabr-11 dekabr arası keçiriləcək. İspaniya, İngiltərə, İtaliya və Almaniya milli futbol çempionatlarında 1-4-cü yeri tutan komandalar Çempionlar Liqasına bu mərhələdən başlayır.
Fransa və Rusiya çempionatlarında 1-2-ci yeri tutan komandalar, Portuqaliya, Ukrayna, Belçika və Türkiyə çempionları da qrup mərhələsinə birbaşa vəsiqə alır.
1/8 final mərhələsi 2020-ci il fevralın 18-dən martın 18-dək çəkəcək, 1/4 final raundu 7-15 aprel arası, yarımfinal 28 aprel-6 may arası keçiriləcək.
Final oyunu mayın 30-na (İstanbul) təyin edilib.
Avropa Liqasında təsnifat raundu bu il 27 iyun-4 iyul arasında, birinci mərhələ 11-18 iyul arasında, ikinci mərhələ 25 iyul-1 avqust arasında, üçüncü mərhələ 8-15 avqust arasında, dördüncü mərhələ 22-29 avqust arasında baş tutacaq.
Qrup raundu sentyabrın 19-dan dekabrın 12-dək davam edəcək.
1/16 final gələn il fevralın 20-27-də, 1/8 final martın 12-19-da, 1/4 final aprelin 9-16-da, yarımfinal 30 aprel-7 may arası keçiriləcək.
Final mayın 27-də (Qdansk) olacaq.
Azərbaycan çempionatında 2-3-cü yeri tutan komandalar turnirə təsnifat raundundan sonrakı mərhələdən – birinci mərhələdən başlayacaq, ölkə kubokunun sahibi isə turnirə ikinci mərhələdən qoşulacaq.
