“Futbol+” aksiyalara başlayıb
Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) aprelin 1-dən maliyyə yardımını dayandırdığı “Futbol+” qəzetinin kollektivi aprelin 9-u Bakıda etiraz aksiyası keçirib. KİVDF-nin ofisinin önünə toplaşan qəzetçilər “Haqqımızı istəyirik”, “Bizi eşit, Prezident!”, “KİVDF, ədalətsizliyə son qoy!” plakatları qaldıraraq etiraz şüarları səsləndiriblər.
Qəzetin baş redaktoru Mahir Rüstəmli jurnalistlərə deyib ki, bu, redaksiyanın ilk etiraz aksiyasıdır: “Təəssüflər olsun ki, ölkənin ən populyar idman nəşri maliyyələşmədən kənardadır. Heç bir əsas göstərmirlər. Yalançı bir əsasları var ki, ictimai-siyasi nəşrləri maliyyələşdirirlər. Təbii ki, bu, əsas yox, bəhanədir, yalnız “Futbol+”in media bazarından sıxışdırılıb çıxarılmasına yönəlmiş bir addımdır. Bir qəzeti çökdürmək üçün atılmış addımdır. Biz də bu ədalətsizliyə, haqsızlığa etiraz edirik. Nə mümkündürsə, edəcəyik ki, haqqımız bərpa olunsun”.
Mahir Rüstəmli deyib ki, redaksiya Prezident Administrasiyasının qarşısında, ABŞ-ın Azərbaycandakı səfirliyinin qarşısında da aksiyalar planlaşdırır: “İnsan hüquqlarının və demokratiyanın qorunması ilə məşğul olan qeyri-hökumət təşkilatlarına müraciət edəcəyik. Bunlar da bir bəhrə verməyəcəyi halda “Futbol+” kollektivinin növbəti addımı ölüm aclığına başlamaq olacaq”.
Novator.az-ın məlumatına görə, KİVDF-nin qərarına yenidən baxılmasını, “Futbol+” qəzetinə ayrılan aylıq maliyyənin bərpasını tələb edən redaksiya üzvləri aprelin 9-da Prezident Administrasiyasına da gediblər. Mahir Rüstəmli, qəzetin reklam direktoru İlqar Əliyev və yazarı Rəşad Qasımov qəbul otağında olublar. Aprelin 11-də administrasiyada yeni qəbul gözlənir.
Qəzetlərə maliyyə yardımı: şərtlər dəyişdi
“Yeni Müsavat” abunə marafonuna start verib
Son illər hansı qəzetlər bağlanıb?
KİVDF-nin “Qəzetlər nə zaman öləcək” sualına cavabı
Qəzetlərə maliyyə yardımı şərtləri yeniləndi
Dövlətdən pul alacaq qəzetlərin siyahısı
