Toni Memmel Azərbaycanda pulsuz konsertlər verir
Amerikalı müğənni, bəstəkar, natiq Toni Memmel Azərbaycanda səfərdədir.
Bu səfər ABŞ Dövlət Departamentinin “İncəsənət elçisi” proqramının himayəsi ilə gerçəkləşdirilir.
Səfəri ABŞ-ın Azərbaycandakı səfirliyi dəstəkləyir.
Səfirlikdən Novator.az-a verilən məlumatda deyilir ki, “İncəsənət elçisi” proqramı çərçivəsində Amerika musiqiçilərinin mədəniyyətlərarası anlaşma və əməkdaşlığı inkişaf etdirmək üçün dünyanın müxtəlif ölkələrinə səfərləri təşkil olunur.
Toni Memmel fiziki əngəlli musiqiçidir və onun proqramı fiziki əngəlli insanların və onların məhdudiyyətsiz potensialının olmasını göstərir.
ABŞ səfirliyi proqrama dəstək verdiyi üçün Azərbaycanın Təhsil, Əmək və Əhalinin Sosial Müdafiəsi nazirliklərinə təşəkkürünü bildirir.
Anadangəlmə dirsəkdən aşağı qolu olmasa da Toni Memmel gitarada çalmağa kömək edə biləcək bir alət düzəldib və təkbaşına gitarada çalmağı öyrənib.
O, 2013-cü ildə WAMI (Viskonsın Bölgəsinin Musiqi Sənayesi) mükafatını qazanaraq Bon İver, Les Pol, Kori Çisel və Bo Dins kimi müğənni-bəstəkarlar sırasına qoşulub, bundan sonra “Assoşieyted Pres”, CNN, “Boston Qlob”, “Milvauki Cournal Sentinel” və “Çikaqo Tribyun” kimi mətbuat orqanları onun fəaliyyətini işıqlandırmağa başlayıb.
Toni Memmel davamlı şəkildə həyata keçirilən geniş qastrollarda iştirakı nəticəsində ABŞ-ın 45 ştatına və 10 xarici ölkəyə səyahət edərək konsertlər verib. O, bu günə qədər 4 böyük və 2 kiçik həcmli albom ərsəyə gətirib və musiqi yolu ilə mədəni əlaqələr qurmaq üçün məktəb, xəstəxana, uşaq evlərində konsertlərlə çıxış edib.
Toni Memmel musiqi sahəsində bakalavr dərəcəsini qazanaraq klassik vokal üzrə ixtisaslaşıb.
Memmel Azərbaycanda bir neçə pulsuz konsert verəcək. O, fiziki əngəlli yerli musiqiçi və tələbələr üçün ustad dərsləri keçəcək. Memmelin Azərbaycandakı bütün konsertləri ödənişsizdir, giriş hamı üçün sərbəstdir. ABŞ səfirliyi fiziki əngəlli insanlara kömək göstərmək istəyən şəxsləri bu konsertlərin birində iştirak etməyə dəvət edir:
9 aprel – “Park Bulvar Moll”, Bakı, saat 19:00
10 aprel – Xaçmaz, Amerika Mərkəzi/Mərkəzi Kitabxana, saat 15:00
11 aprel – Azərbaycan Milli Musiqi Konservatoriyası, Bakı, saat 17:00
12 aprel – Salyan Amerika Mərkəzi/Salyan Mərkəzi Kitabxana, saat 15:00
Ətraflı məlumat əldə etmək üçün ABŞ-ın Azərbaycandakı səfirliyinin “Facebook” səhifəsinə müraciət etmək olar:
www.facebook.com/baku.usembassy
