“Sepah” qərarı gərginliyi artırdı
ABŞ-la İran arasında yeni gərginlik yaranıb. Aprelin 8-də ABŞ prezidenti Donald Tramp bəyanat yayaraq İran İnqilab Keşikçiləri Korpusunun (“Sepah”) terrorçu təşkilatlar siyahısına daxil edildiyini bildirib. O deyib ki, Dövlət Departamentinin rəhbərliyi altında atılan bu addım İranın təkcə terrorizmi dəstəkləyən dövlət olduğunu deyil, eləcə də “Sepah”ın dövlət qurumu kimi terror aktlarında fəal iştirak etdiyini və terrorizmin yayılmasını maliyyələşdirdiyini göstərir: “Sepah” İran rejiminin dünyada terrorizmi idarə və təbliğ etməsi və onu maliyyələşdirməsi üçün əsas alətlərdən biridir”.
“Sepah”ın terrorçu qruplaşmalar siyahısına daxil edilməsinin təfərrüatlarının gələn həftə açıqlanacağı və İrana bununla bağlı əlavə sanksiyalar tətbiq ediləcəyi vurğulanır.
İran Silahlı Qüvvələrinin tərkib hissəsi olan “Sepah” 1979-cu ildə yaradılıb.
Gunaz.tv-nin məlumatına görə, İranın Ali Milli Təhlükəsizlik Şurası aprelin 8-i gecə bəyanat yayaraq ABŞ-ın Asiyadakı Mərkəz Komandanlığını və amerikalı əsgərləri terrorçu qrup adlandırıb. Bəyanatda bildirilir ki, Ağ evin qərarının təhlükəli fəsadlarının məsuliyyəti ABŞ-ın üzərinə düşəcək: “Amerikanın “Sepah”ı terrorçu qruplar siyahısına daxil etməsi regional və beynəlxalq sülh və təhlükəsizliyə qarşı əsas təhlükədir. Bu həm də BMT bəyannaməsinin və beynəlxalq hüquq qayda və normalarının açıq şəkildə pozulması deməkdir”.
2015-ci il iyulun 14-də İranla ABŞ, Böyük Britaniya, Fransa, Rusiya, Çin, Almaniya, eləcə də Avropa İttifaqı arasında Tehranın atom enerjisi proqramı ilə bağlı razılaşma imzalanıb. Həmin gün Beynəlxalq Atom Enerjisi Agentliyi ilə İran arasında saziş də bağlanıb.
Razılaşmalar İranın üzərindən ABŞ, Avropa İttifaqı və BMT Təhlükəsizlik Şurasının tətbiq etdiyi iqtisadi sanksiyaları götürüb, İran isə əvəzində nüvə obyektlərini beynəlxalq yoxlamalara tam açıb.
Tehranın nüvə silahı hazırlamağa çalışdığını iddia edən ABŞ ötən ilin yayında razılaşmadan çıxıb və İrana sanksiyalar tətbiq etməyə başlayıb.
