Müsavatın qurultay hazırlığı
Aprelin 5-də Novator.az Müsavat Partiyasının 9-cu qurultayına hazırlığın gedişi ilə maraqlanıb.
Qurultay komitəsinin sədri, partiya başqanının müavini Gülağa Aslanlı bildirib ki, rayon təşkilatlarının ümumi yığıncaq və konfransları davam etdirilir: “30-dan çox rayon təşkilatında yarımleqal şəraitdə ümumi yığıncaq və konfrans keçirilib, qurultay nümayəndələri seçilib. 30-a qədər rayon təşkilatında yığıncaqların keçirilməsi tarixlərini dəqiqləşdiririk. Rayon təşkilatlarının üçdə ikisində yığıncaqlar keçiriləndən və nümayəndələr seçiləndən sonra qurultayın gününü müəyyənləşdirib tədbirə yer ayrılması üçün müraciət edə bilərik”.
Müsavat Partiyası 1911-ci ildə yaradılıb. Partiyanın ilk başqanı Məhəmməd Əmin Rəsulzadə, ikinci başqanı Mirzə Bala Məmmədzadə, üçüncü başqanı Kərim Odər, dördüncü başqanı Məhəmməd Azər Aran olub.
Sovet hakimiyyəti illərində mühacirətdə fəaliyyət göstərən partiya 1992-ci ildə Bakıda keçirilən 3-cü qurultayda bərpa olunub, İsa Qəmbər başqan seçilib. Partiyanın 1995, 1997, 2001 və 2006-cı illərdə keçirilən qurultayları İsa Qəmbəri başqan postunda saxlayıb.
2014-cü ilin sentyabrında keçirilən 8-ci qurultayda başqan vəzifəsinə Arif Hacılı seçilib.
