Məcburi köçkünlər üçün yeni yaşayış kompleksi
Aprelin 5-i Bakının Kürdəxanı qəsəbəsində məcburi köçkün ailələri üçün inşa edilən yeni yaşayış kompleksi açılıb. AZƏRTAC xəbər verir ki, mərasimə prezident İlham Əliyev qatılıb.
Ərazidə doqquzmərtəbəli 15 bina tikilib, bunlardan 9-u 54, 4-ü 36, digərləri 108 və 72 mənzillidir. Yeni yaşayış kompleksində məktəb və uşaq bağçası, o cümlədən digər zəruri infrastruktur obyektləri – klub-icma mərkəzi, həkim məntəqəsi inşa edilib, istirahət parkı salınıb, uşaq meydançaları yaradılıb, ərazidə geniş abadlıq və yaşıllaşdırma işləri görülüb.
Mənzillərin 72-si birotaqlı, 360-ı ikiotaqlı, 306-sı üçotaqlı, 72-si dördotaqlıdır. Bütün mənzillər təmir edilib və mətbəx mebeli ilə təchiz olunub. Yeni yaşayış kompleksində hazırda paytaxtdakı yataqxanalarda və digər inzibati binalarda müvəqqəti məskunlaşmış məcburi köçkün ailələri mənzillə təmin olunacaqlar.
Prezident İlham Əliyev uşaq bağçasında yaradılan şəraitlə tanış olub. Şuşa rayon 7 nömrəli tam orta məktəbinə də baş çəkən İlham Əliyevə məlumat verilib ki, bu təhsil ocağı 560 şagird yerlikdir.
İlham Əliyev məcburi köçkünlərlə görüş də keçirib.
