Müsavatın aksiya müraciətinə rədd cavabı gəldi
Bakı Şəhər İcra Hakimiyyəti Müsavat Partiyasının aprelin 7-nə təyin etdiyi aksiya ilə bağlı müraciətinə cavab verib.
Novator.az-ın məlumatına görə, Müsavat başqanı Arif Hacılı aprelin 3-də “Facebook” şəbəkəsində yazıb ki, meriya aksiyanın keçirilməsini məqsədəuyğun saymayıb.
Arif Hacılı qeyd edib ki, onlar kütləvi aksiya üçün paytaxtdakı 3 meydandan birinin (Yasamal rayonundakı İdman-Sağlamlıq Kompleksinin stadionu; “Dərnəgül” metro stansiyası yanındakı meydan; Tofiq Bəhramov stadionu qarşısındakı meydan) ayrılmasını istəmişdilər.
Arif Hacılının bildirdiyinə görə, bir neçə variant təklif etməkdə məqsəd hökumətin bəhanələrini kəsmək olub: “Lakin kompromis imkanları olan, alternativlərin də göstərildiyi təkliflərimiz qəbul edilməyib. “Sərbəst toplaşmaq azadlığı haqqında” qanun növbəti dəfə pozulub. Xalqın öz iradəsini ifadə etməsi üçün ən vacib hüquqlardan biri olan sərbəst toplaşmaq azadlığının təmin olunması uğrunda mübarizəmiz hüquqi və siyasi müstəvidə davam edəcək”.
Müsavat 7 aprel aksiyasında sosial və siyasi tələblər irəli sürməyi nəzərdə tuturdu.
Bakı Şəhər İcra Hakimiyyəti Müsavat Partiyasının yanvarın 12-də və martın 10-da oxşar tələblərlə keçirmək istədiyi kütləvi aksiyalara da rədd cavabı verib.
