Milli Şuranın mitinqinə razılıq verilmədi
Bakı Şəhər İcra Hakimiyyəti Demokratik Qüvvələrin Milli Şurasının aprelin 6-da keçirmək istədiyi mitinqə razılıq verməyib.
Novator.az-ın məlumatına görə, meriyanın 6 aprel mitinqini məqsədəuyğun saymadığı haqda məktub aksiyanın təşkilatçılarına aprelin 3-də təqdim olunub.
Milli Şura mitinqi paytaxtın Yasamal rayonundakı İdman-Sağlamlıq Kompleksinin stadionuna (metronun “İnşaatçılar” stansiyasının yaxınlığında) təyin etmişdi. Aksiyanın əsas tələblərinin siyasi məhbusların azadlığı, korrupsiyaya son qoyulması, sosial problemlərin həlli olduğu açıqlanmışdı.
Milli Şura bu il yanvarın 19-da həmin stadionda mitinq keçirib. Aksiyada siyasi məhbuslara azadlıq tələb olunub, sosial tələblər irəli sürülüb.
Yanvarın 26-sı, fevralın 23-ü və martın 2-si eyni yerə təyin olunmuş, siyasi və sosial islahatlar tələbli mitinqlərə razılıq verilməyib. Bakı Şəhər İcra Hakimiyyəti mitinqlər üçün müraciətlərə rədd cavablarını Milli Şuranın 19 yanvar mitinqindən sonra ictimai asayişin pozulması ilə əsaslandırıb.
2013-cü ildə yaradılmış Milli Şuraya tarixçi alim Cəmil Həsənli sədrlik edir. Qurumun öncül şəxsləri arasında AXCP sədri Əli Kərimli, Müsavat Partiyasından Tofiq Yaqublu, Vətəndaş Həmrəyliyi Partiyasından Rafiq Manaflı, Qarabağ Uğrunda İslami Müqavimət Hərəkatından Rövşən Əhmədli, sabiq deputatlar İbrahim İbrahimli, Gültəkin Hacıbəyli və başqaları var.
