Bayram Məmmədov işgəncəyə məruz qaldığını iddia edir
Bakı Apellyasiya Məhkəməsi aprelin 2-də gənc fəal Bayram Məmmədovun həbsindən verilmiş şikayətə baxıb.
Söhbət inzibati həbsdən gedir. Martın 30-da Bayram Məmmədova 30 sutka inzibati həbs verilib. O, polisin qanuni tələbinə tabe olmamaqda təqsirli bilinib.
“Turan”ın məlumatına görə, apellyasiya məhkəməsində Bayram Məmmədov ittihamın qurama olduğunu söyləyib.
Bundan başqa o, Bakı polisinin inzibati həbs məntəqəsində işgəncəyə məruz qaldığını, rezin kameraya salınaraq əl-ayağı bağlı vəziyyətdə bir sutka üzü üstə saxlandığını, döyüldüyünü iddia edib.
Hakim Namiq Məmmədov 30 günlük həbs qərarını qüvvədə saxlayıb, həmçinin işgəncə şikayətinin araşdırılması üçün prokurorluğa təqdimat göndərilməsi barədə qərar qəbul edib.
Bayram Məmmədov digər gənc fəal Qiyas İbrahimovla birgə 2016-cı il mayın 10-dan həbsdə olub. Həmin il Bakı Ağır Cinayətlər Məhkəməsi onları külli miqdarda narkotik vasitə saxlamaqda təqsirli bilərək 10 il müddətinə azadlıqdan məhrum edib. Sonradan Qiyas İbrahimovun cəzası 3 ay artırılıb.
Müdafiəçiləri onların həbsini siyasi sifariş sayıb. Onlar bildiriblər ki, 2016-cı il mayın 10-na keçən gecə mərhum prezident Heydər Əliyevin Bakının mərkəzindəki abidəsinə etiraz şüarları yazılıb, gənclər bu şüarlara görə tutulublar.
2019-cu il martın 17-də hər iki gənc prezidentin əfv sərəncamı ilə azadlığa buraxılıb.
