Dövlətdən pul alacaq qəzetlərin siyahısı
Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurası 2019-cu ilin ikinci rübündə maliyyə dəstəyi alacaq qəzetlərin siyahısını açıqlayıb. Novator.az-ın məlumatına görə, maliyyələşdiriləcək ictimai-siyasi qəzetlər gündəlik, günaşırı və həftəlik nəşrlərə bölünüb.
Tirajı 3000 nüsxədən, satış və abunəsinin cəmi 2000 nüsxədən, səhifələrinin sayı 16-dan (A3, B2 formatda) az olmayan gündəlik (həftədə 5 dəfədən az olmayaraq çap olunan) qəzetlərə aylıq 20 min manat maliyyə yardımı ayrılır.
Həmin qəzetlər bunlardır: “Bakı xəbər”, “Kaspi”, “Yeni Müsavat”, “Səs”, “Yeni Azərbaycan”, “Mövqe”, “Kaspiy”.
Tirajı 2500 nüsxədən, satış və abunəsinin cəmi 1500 nüsxədən, səhifələrinin sayı 16-dan (A3, B2 formatda) az olmayan, günaşırı (həftədə 3 dəfədən az olmayaraq çap olunan) qəzetlər ayda 10 min manat maliyyə vəsaiti alacaq.
Həmin qəzetlər bunlardır: “Həftə içi”, “Novoye vremya”, “Azernews”, “525-ci qəzet”, “Xalq Cəbhəsi”, “Paralel”, “Hürriyyət”, “Olaylar”, “Palitra”, “Ədalət”, “Üç nöqtə”, “Azad Azərbaycan”, “Şərq”.
Tirajı 2500 nüsxədən, satış və abunəsinin cəmi 1500 nüsxədən, səhifələrinin sayı 24-dən (A3, B2 formatda) az olmayan həftəlik qəzetlərə aylıq 5 min manat maliyyə vəsaitinin ayrılması qərara alınıb.
Həmin qəzetlər bunlardır: “Oxu məni”, “Unikal”, “Bizim yol”, “Türküstan”, “The Business Times”, “Hərbi and”.
