Ukrayna: seçki yarışı ikinci tura qaldı
Ukraynada prezident seçkisinin ilk turu başa çatıb. Novator.az bildirir ki, martın 31-də keçirilmiş səsvermənin ilkin nəticələri şoumen Vladimir Zelenskini önə çıxarır: 30,16%.
İndiki prezident Pyotr Poroşenko 16,69% səslə ikinci yerdə gedir.
Deputat Yuliya Timoşenko 13,08% səslə üçüncüdür.
Dövlət başçısı postu uğrunda 38 namizəd mübarizə aparırdı.
Vladimir Zelenski 1978-ci il yanvarın 25-də doğulub. Krivoy Roq İqtisadiyyat İnstitutunu hüquqşünas diplomu ilə bitirib.
1997-ci ildə “95-ci kvartal” şən və hazırcavablar komandası yaradaraq onun kapitanı olub. 2003-cü ildən Ukraynanın “1+1” telekanalı ilə əməkdaşlıq edib, kulinar şounun aparıcısı kimi ad çıxarıb. 2005-ci ildən “İnter” telekanalında axşam şousuna müəlliflik edib, məşhurlaşaraq müxtəlif tamaşalarda, filmlərdə rollar alıb.
Pyotr Poroşenko 2014-cü il mayın 25-də Ukrayna prezidenti seçilib, iyunun 7-də səlahiyyətlərinin icrasına başlayıb.
1965-ci il sentyabrın 26-da Ukraynanın Odessa vilayətində doğulan Pyotr Poroşenko 1989-cu ildə Kiyev Dövlət Universitetinin beynəlxalq münasibətlər və beynəlxalq hüquq fakültəsini, 1992-ci ildə həmin təhsil ocağının aspiranturasını bitirib. Hüquq elmləri namizədidir.
1993-cü ildən “Ukrprominvest” konserninin baş direktoru, 2002-ci ildən Ukrayna Milli Bankı Şurasının sədr müavini, 2007-ci ildən sədri olub.
2005-ci ildə Milli Təhlükəsizlik və Müdafiə Şurasının katibi, 2009-2010-cu illərdə xarici işlər naziri, 2012-ci ildə iqtisadi inkişaf və ticarət nazir postlarını tutub.
1998, 2002, 2006 və 2012-ci illərin parlament seçkilərində deputat mandatı alıb.
