Orduda yeni hazırlıqlar
Müdafiə Nazirliyinin 1 aprel məlumatına görə, Hava Hücumundan Müdafiə Qoşunlarının taktiki-xüsusi məşğələləri keçirilib. Məşğələlər zamanı zenit-raket komplekslərinin divizionları mövqe rayonlarına marş edərək start mövqelərinə yerdəyişmə, ərazinin hazırlanması və maskalanması tapşırıqlarını icra ediblər.
Raket bölmələri vacib obyektlərin hava hücumundan mühafizəsi, habelə şərti düşmənin raket zərbələrinin dəf edilməsi üzrə tapşırıqları da yerinə yetiriblər.
Başqa bir rəsmi məlumata əsasən, Azərbaycan Ordusunun hərbi hissələri arasında “Ən yaxşı snayper” adı uğrunda yarış keçirilib. Snayperlər hədəflərə fərdi və qrup şəklində atışlar edib, maneələrin dəf edilməsi üzrə tapşırıqları yerinə yetiriblər.
