Şanslı namizədlərin reytinqi
Martın 31-i Ukraynada prezident seçkisidir. Novator.az-ın məlumatına görə, dövlət başçısı postu uğrunda 38 namizəd mübarizə aparır. İlk turda qələbə üçün 50 faizdən çox səs toplamaq tələb olunur. Daha şanslı namizədlərin dövlət başçısı Pyotr Poroşenko, şoumen Vladimir Zelenski, deputatlar Yuliya Timoşenko, Yuri Boyko, Anatoli Qritsenko, Oleq Lyaşko olduğu vurğulanır.
Demokratik Təşəbbüslər Fondu və Kiyev Beynəlxalq Sosiologiya İnstitutu şanslı namizədlərə hansı yaş qruplarının daha çox dəstək verdiyini araşdırıb. 30 yaşadək seçicilər arasında Vladimir Zelenski daha populyardır: 45%. Bu yaş qrupunun 7,3%-i Pyotr Poroşenkoya, 4,6%-i Oleq Lyaşkoya, 2,8%-i Yuliya Timoşenkoya, 1,8%-i Anatoli Qritsenkoya, 1,4%-i Yuri Boykoya səs vermək niyyətində olduğunu açıqlayıb.
Vladimir Zelenski 45 yaşadək seçicilər arasında da populyardır: 26%. Pyotr Poroşenko 14,8%-lə ikinci, Yuliya Timoşenko 7,3%-lə üçüncü sırada göstərilir.
60 yaşadək seçicilərin 14,9%-i Pyotr Poroşenkoya, 12,4%-i Vladimir Zelenskiyə, 12,2%-i Yuliya Timoşenkoya dəstək ifadə edib. Bu qrup seçicilər arasında Yuri Boyko da üstün mövqedədir: 10,8%.
60 və daha yuxarı yaşda olan seçicilərin arasında həm Pyotr Poroşenko, həm də Yuri Boyko 12,8% dəstək alıb. Yuliya Timoşenko 12,3%-lə üçüncü sırada gəlir.
