“Diqlas” sərəncamı: prezident 3 milyon manat ayırdı
Martın 29-da prezident İlham Əliyevin sərəncamı dərc olunub. Sərəncam Bakının Nizami rayonundakı “Diqlas” ticarət mərkəzində fəaliyyət göstərmiş sahibkarlara maddi yardım üçün 2019-cu ilin dövlət büdcəsindən, prezidentin ehtiyat fondundan İqtisadiyyat Nazirliyinə ilkin olaraq 3 milyon manat ayrılmasını nəzərdə tutur.
İqtisadiyyat Nazirliyi zərər çəkmiş sahibkarlara maddi yardım göstərilməsi qaydasını üç gün müddətində təsdiq etməlidir.
“Diqlas” ticarət mərkəzi martın 26-da yanıb. Martın 28-də prezident İlham Əliyev yanğınla əlaqədar müşavirə keçirərək bildirib ki, İqtisadiyyat Nazirliyi yanğında zərər çəkmiş sahibkarlarla bir-bir görüşməli və onların problemlərini dinləməli, Maliyyə Nazirliyi operativ qaydada ilkin olaraq maliyyə vəsaiti ayırmalı və həmin vəsait sahibkarlara verilməli, digər müvafiq qurumlar da yanmış malların qiymətini sahibkarlarla birlikdə aydınlaşdırmalıdır.
Yanğında zərər çəkmiş sahibkarlarla operativ əlaqələrin qurulması və onlara dəstək göstərilməsi işlərinin koordinasiyalı təşkili üçün İqtisadiyyat Nazirliyində işçi qrupu yaradılıb. İşçi qrupu martın 29-dan sahibkarları fərdi qaydada qəbul edərək müraciətlərinə baxır.
Tədbirə İqtisadiyyat Nazirliyinin strukturuna daxil olan və tabeliyindəki qurumların rəhbər şəxsləri, Dövlət Gömrük Komitəsi, Maliyyə, Fövqəladə Hallar və Vergilər nazirliklərinin, eləcə də Nizami Rayon İcra Hakimiyyəti və Maliyyə Bazarlarına Nəzarət Palatasının nümayəndələri qatılıb.
