Sosialist namizəd seçki yarışından çıxdı
Ukrayna Sosialist Partiyasının prezidentliyə namizədi Aleksandr Moroz seçki yarışından geri çəkilib. Novator.az-ın məlumatına görə, Aleksandr Moroz Mərkəzi Seçki Komissiyasına martın 27-də yazdığı ərizədə imtinasını marafonun saxtakarlıqla yekunlaşacağına əmin olması ilə əsaslandırıb.
75 yaşlı Aleksandr Moroz 1994-1998 və 2006-2007-ci illərdə Ukrayna parlamentinin sədri postunu tutub.
Prezident seçkisi martın 31-də keçiriləcək. Dövlət başçısı postu uğrunda mübarizəyə qoşulanların 5-i seçkidən bülletenlər çap olunmamış çıxıb. Lvov şəhərinin meri, Samopomoş Partiyasının lideri Andrey Sadovıy, İnsanların Gücü Partiyasının namizədi Dmitri Qnap, Xalq Nəzarəti Partiyasının lideri Dmitri Dobrodomov namizədliklərini geri götürərək Vətəndaş Mövqeyi Partiyasının başçısı, deputat Anatoli Qritsenkoya dəstək veriblər.
Yevgeni Murayev seçki yarışından Aleksandr Vilkulun, Sergey Krivonos dövlət başçısı Pyotr Poroşenkonun xeyrinə geri çəkiliblər.
Namizədliyin ləğvi prosesi martın 7-də başa çatıb.
Aleksandr Morozun seçkidən imtinası hüquqi qüvvə daşımasa da, onu çıxanda prezidentliyə 38 iddiaçı qalır. İlk turda qələbə üçün 50 faizdən çox səs toplamaq tələb olunur.
“Sosis” tədqiqatlar mərkəzinin son sorğusuna əsasən, ukraynalıların 24,6 faizi seçkidə şoumen Vladimir Zelenskiyə, 14,8 faizi dövlət başçısı Pyotr Poroşenkoya səs vermək niyyətindədir.
Ali Radanın deputatlarından Yuliya Timoşenko sorğuda 8,7 faiz, Yuri Boyko 7,9 faiz, Anatoli Qritsenko 6,4 faiz, Oleq Lyaşko 5,3 faiz səs yığıb.
