Baş redaktora hökm oxundu
Martın 28-də Bakı Ağır Cinayətlər Məhkəməsində Teref.info saytının baş redaktoru Nurəddin Xocanın (Nurəddin İsmayılov) işi üzrə hökm elan olunub.
“Report”un xəbərinə görə, Nurəddin Xocaya 5 il 6 ay şərti azadlıqdan məhrumetmə cəzası verilib.
Baş redaktor vəzifə səlahiyyətlərini aşmaqda, vəzifə saxtakarlığında və Teref.info saytında dövlət əleyhinə açıq çağırışlar etməkdə (Cinayət Məcəlləsinin 281.2, 309 və 313-cü maddələri) təqsirli bilinib.
1957-ci il təvəllüdlü Nurəddin Xoca vaxtilə Qarabağ müharibəsinin iştirakçısı olub, döyüşlərdə “Bozqurd” adlı batalyona komandirlik edib.
Teref.info saytına giriş 2018-ci ildə Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin iddiası, Səbail Rayon Məhkəməsinin qərarı əsasında məhdudlaşdırılıb.
