Təlimlərin əsas mərhələsi
Azərbaycan Ordusunun genişmiqyaslı təlimlərində döyüş atışlı əsas mərhələ icra olunub. Müdafiə Nazirliyinin 14 mart məlumatına görə, müxtəlif qoşun növləri silah və texnikanın tətbiqi ilə təlim-döyüş tapşırıqlarını məşq ediblər. Qoşunlar, eləcə də idarəetmə sistemləri şərti düşmənin ehtimal olunan həmlələrini nəzərə alaraq qarşılıqlı əlaqədə effektiv fəaliyyət nümayiş etdiriblər.
Poliqonlarda və müasir qurğularla təchiz edilmiş təlim sahələrində bölmələr döyüş atışları və atəşlə manevrlər yerinə yetiriblər. Əsas diqqət müasir silah və hərbi texnikanın tətbiqi ilə taktiki tapşırıqların yeni üsullarla icrasına yönəldilib.
Martın 11-də başlayan genişmiqyaslı təlimlərə 10 min nəfərədək şəxsi heyət, 500-dək tank, zirehli texnika, avtomobil və xüsusi texnika, 300-dək müxtəlif çaplı raket və artilleriya qurğusu, reaktiv yaylım atəş sistemi və minaatan, 20-dək müxtəlif təyinatlı ordu və cəbhə aviasiyası cəlb olunub.
