Maliyyə yoxlamalarında nələr üzə çıxıb?
Maliyyə Nazirliyi Dövlət Maliyyə Nəzarəti Xidmətinin 2018-ci ildə apardığı nəzarət tədbirlərinin hesabatını yayıb. Rəsmi məlumata görə, il ərzində 7 milyon 27,1 min manat məbləğində artıq və əsassız ödənişlər aşkar edilib, həmin vəsaitin 2 milyon 195,3 min manatının bərpası təmin olunub, digər əsassız ödənişlər dayandırılıb.
2018-ci ildə dövlət büdcəsindən maliyyələşən 10 icra hakimiyyətinə, 7 şəhər ərazi nümayəndəliyinə, 5 təhsil, 7 səhiyyə və 1 geodeziya və kartoqrafiya müəssisəsinə, 2 elmi tədqiqat institutuna, 1 protez-ortopedik bərpa və 1 uşaq bərpa mərkəzinə, 1 ali təhsil müəssisəsinə, 2 səfirliyə, 1 nəqliyyat agentliyinə, 1 mədəniyyət müəssisəsinə, Əmək və Əhalinin Sosial Müdafiəsi Nazirliyinin Dövlət Məşğulluq Xidmətinə və onun 3 rayon məşğulluq mərkəzinə, bir sıra şəhər və rayonlarda yerləşən büdcə təşkilatlarına ayrılmış vəsaitlərin təyinatı üzrə xərclənməsinə nəzarət tədbirləri həyata keçirilib. Maliyyə qaydalarının pozulmasına yol vermiş vəzifəli şəxslər barəsində inzibati protokollar tərtib edilib, 676 vəzifəli şəxsə ümumilikdə 554,6 min manat məbləğində cərimələr tətbiq olunub.
12 təşkilatda aşkar edilmiş artıq ödənişlərin 4 milyon 550,5 min manat hissəsinə dair nəzarət tədbirləri üzrə mənimsəmə əlamətləri müşahidə olunub, müvafiq sənədlər Baş Prokurorluğa göndərilib.
26 təşkilatda aşkar edilmiş əsassız ödənişlərin 473,1 min manat hissəsinə dair nəzarət tədbirlərinə dair sənədlər də icraatın başlanması üçün prokurorluq orqanlarına təqdim edilib.
Hüquq mühafizə orqanlarının qərarlarına əsasən 12 təşkilatda aparılmış yoxlamalar yekunlaşdırılıb.
