İxracın 90 faizindən çoxu neft və qazdır
Dövlət Gömrük Komitəsi 2019-cu ilin ilk iki ayının hesabatını açıqlayıb. Novator.az bildirir ki, rəsmi məlumata görə, yanvar-fevral aylarında Azərbaycanın xarici ticarət əməliyyatlarının həcmi 5,3 milyard dollar olub. Bunun 3,1 milyard dolları ixrac, 2,2 milyard dolları idxaldır.
İki ayda 144 ölkə ilə ticarət əməliyyatı aparılıb, gömrük orqanları büdcəyə 665,7 milyon manat ödəyib.
İxracın 82,6 faizi xam neft və xam neft məhsulları, 1,5 faizi neft məhsulları, 6,7 faizi təbii qaz, 2,4 faizi meyvə-tərəvəz olub.
İdxalın 18,5 faizi maşın, mexanizm, elektrik aparatları, avadanlıqlar və onların hissələri, 11,3 faizi yeyinti məhsulları, 6,9 faizi nəqliyyat vasitələri və onların hissələri, 6,6 faizi qara metallar və onlardan hazırlanan məmulatlar, 2,5 faizi plastmassa və ondan hazırlanan məmulatlar, 1,7 faizi oduncaq və ondan hazırlanan məmulatlar, bir o qədəri əczaçılıq məhsulları, 1,6 faizi geyim əşyaları və geyim üçün ləvazimat kimi rəsmiləşib.
Yanvar-fevral aylarında ixracın 4,6 faizi MDB ölkələrinin, 69,8 faizi Avropa İttifaqı ölkələrinin, 25,6 faizi digər ölkələrin payına düşüb.
İdxalda MDB-nin payı 19,7 faiz, Avropa İttifaqının payı 15,2 faiz, digər ölkələrin payı 65,1 faiz göstərilir.
Əsas tərəfdaş İtaliya olub. Bu ölkə ilə ticarət iki aylıq dövriyyənin 23,3 faizi həcmində rəsmiləşib. Türkiyə 8,9 faizlə ikinci, Rusiya 6,4 faizlə üçüncüdür.
İxracda əsas ölkə İtaliya (37,7 faiz), idxalda İsveçrədir (12,7 faiz).
