Akif Əli pensiyaya çıxdı
Akif Əli Nazirlər Kabinetinin mətbuat xidmətinin rəhbəri vəzifəsindən gedib. O, martın 15-də Report.az-a deyib ki, təqaüdə göndərilmək üçün baş nazir Novruz Məmmədova müraciət edib və müvafiq qərar verilib: “Bundan sonra sırf yaradıcılıq fəaliyyəti ilə məşğul olacağam”.
Akif Əli 1952-ci ildə Şuşa şəhərində doğulub. Bakı Slavyan Universitetinin və Bakı Ali Partiya Məktəbinin (indiki Dövlət İdarəçilik Akademiyası) məzunudur.
1970-ci illərdə bir neçə bədii filmdə əsas rollara çəkilib.
1978-1987-ci illərdə Dövlət Televiziya və Radio Verilişləri Komitəsində müxtəlif vəzifələrdə (kiçik redaktor, redaktor, şöbə müdiri, baş redaktor) çalışıb.
1990-cı ildə “Vətən səsi” qəzetinin yaradılmasında iştirak edib və 1991-1993-cü illərdə həmin qəzetin baş redaktoru olub.
Dövlət İdarəçilik Akademiyasında baş müəllim, dosent və kafedra müdiri (1992-1994) vəzifələrində işləyib. Filologiya üzrə fəlsəfə doktorudur.
1994-cü ildən Nazirlər Kabinetinin mətbuat xidmətinin rəhbəri idi.
