Təlim nöqtələrində
Müdafiə Nazirliyi Azərbaycan Ordusunun genişmiqyaslı təlimləri ilə bağlı yeni məlumat yayıb.
Martın 13-ü qərargahlarda tapşırıqlar aydınlaşdırılıb, vəziyyət qiymətləndirilib, qərarlar qəbul edilib və qoşunlara tapşırıqlar qoyulub. Səhra şəraitində ərazidə yaradılmış təlimin komanda idarəetmə məntəqəsində olan müdafiə naziri Zakir Həsənov qoşunların döyüş fəaliyyətinin təşkilini yoxlayıb. Təlim nöqtələrinə baş çəkən nazir döyüş texnikaları, silah-sursat və şəxsi heyətin təlimlərdə iştirakı, eləcə də tapşırıq və sərəncamların dəqiq çatdırılması, icra olunması ilə bağlı müvafiq göstərişlər verib.
Martın 11-də başlayan genişmiqyaslı təlimlərə 10 min nəfərədək şəxsi heyət, 500-dək tank, zirehli texnika, avtomobil və xüsusi texnika, 300-dək müxtəlif çaplı raket və artilleriya qurğusu, reaktiv yaylım atəş sistemi və minaatan, 20-dək müxtəlif təyinatlı ordu və cəbhə aviasiyası cəlb olunub. Təlimlər martın 15-dək davam edəcək.
