Moskvanın niyyəti
Rusiyanın Xarici İşlər Nazirliyi Azərbaycana səfər etmək niyyətində olan ölkə vətəndaşlarına xəbərdarlıq edib. Xəbərdarlıqda deyilir ki, Azərbaycan Dağlıq Qarabağ münaqişəsinin həll edilmədiyini əsas gətirərək erməni milliyyətinə mənsub şəxsləri ölkəyə buraxmaqdan imtina edir: “Bu, həmin şəxslərin təhlükəsizliyini təmin etməyin mümkünsüzlüyü ilə əsaslandırılır. Rusiya Federasiyası vətəndaşların etnik mənsubiyyətinə görə ayrı-seçkiliyə məruz qoymağın yolverilməzliyi barədə Azərbaycana dəfələrlə müraciət etsə də, bu müraciətlərə etinasız yanaşılır. Vəziyyəti nəzərə alaraq Azərbaycana səfər etməyi planlaşdıran Rusiya vətəndaşlarına mümkün riskləri dərindən götür-qoy etməyi tövsiyə edirik”.
Novator.az-ın məlumatına görə, Respublikaçı Alternativ Partiyasının xarici əlaqələr katibi Erkin Qədirli yazır ki, Rusiya Xarici İşlər Nazirliyinin açıqlaması Azərbaycana təzyiqdir: “Erməni soyadlı xarici vətəndaşların ölkəyə buraxılmaması kimi bir təcrübə çoxdan var. Rusiyanın bununla bağlı yalnız indi açıqlama verməsi ölkəmizin Qərbə yön almasına mane olmaq cəhdidir. Üstəlik, Rusiya düşmənimizin rəsmi müttəfiqidir.
Erməni soyadlı xarici vətəndaşların ölkəmizə buraxılmaması legitim təhlükəsizlik tədbiri sayıla bilər. Bunun nə dərəcədə təsirli olması ayrı mövzudur. Müharibə dönəmində demokratik ölkələrin bu cür tədbirlərə əl atmasına dair çeşidli örnəklər var. Ancaq burada söhbət ermənilərin deyil, ölkəmizin təhlükəsizliyindən gedə bilər. Hökumətimizin erməni soyadlı xarici vətəndaşların təhlükəsizliyinə ölkəmizdə təhlükə ola biləcəyini söyləməsi kökündən yanlış, hətta rüsvayçı bir izahdır. Təhlükə erməni soyadlı xarici vətəndaşlara deyil, ölkəmizə ola bilər”.
