Sənayedə artım, sərmayədə azalma
Dövlət Statistika Komitəsi sənaye və sərmayə hesabatları yayıb. Novator.az-ın məlumatına görə, hesabatda bildirilir ki, sənaye müəssisələri və bu sahədə fəaliyyət göstərən fərdi sahibkarlar 2019-cu ilin yanvar-fevral aylarında 7,6 milyard manatlıq və ya 2018-ci ilin ilk iki ayı ilə müqayisədə 4,6 faiz çox məhsul istehsal edib. Sənayenin qeyri-neft sektorunda məhsul istehsalı 15,5 faiz artıb.
Məhsulun 71,7 faizinin mədən sektorunda, 22,7 faizinin emal sektorunda, 4,9 faizinin elektrik enerjisi, qaz və buxar istehsalı, bölüşdürülməsi və təchizatı sektorunda, 0,7 faizinin su təchizatı, tullantıların təmizlənməsi və emalı sektorunda istehsal olunduğu vurğulanır.
Rəsmi açıqlamaya əsasən, yanvar-fevral aylarında ölkənin iqtisadi və sosial sahələrinin inkişafı üçün əsas kapitala 1 milyard 711,2 milyon manat və ya əvvəlki ilin müvafiq dövrü ilə müqayisədə 9,3 faiz az vəsait yönəldilib. Qeyri-neft sektoruna yönəldilmiş vəsaitin həcmi 2 faiz artıb.
Ümumi sərmayənin 60,3 faizi məhsul istehsalı obyektlərinin, 30,5 faizi xidmət sahələri üzrə obyektlərin, 9,2 faizi yaşayış evlərinin tikintisinə sərf olunub. Daxili mənbələrdən əsas kapitala yönəldilmiş vəsait ümumi sərmayənin 68,1 faizini təşkil edib.
Sərmayənin ümumi dəyərində müəssisə və təşkilatların vəsaitləri 66,3 faiz, büdcə vəsaitləri 22 faiz, əhalinin şəxsi vəsaitləri 6,1 faiz, bank kreditləri 4,6 faiz, büdcədənkənar fondların vəsaitləri 0,7 faiz, sair vəsaitlər 0,3 faiz göstərilir.
