Poroşenko seçki sorğusunda ikincidir
Ukraynanın “Sosis” tədqiqatlar mərkəzi 31 mart prezident seçkisi ilə bağlı sorğu keçirib. Novator.az bildirir ki, nəticələrə görə, ukraynalıların 73,2 faizi prezident seçkisində iştirak etmək niyyətindədir.
Sorğu ölkə üzrə 2000 nəfər arasında aparılıb. Respondentlərin 27,7 faizi seçkidə şoumen Vladimir Zelenskiyə, 19,6 faizi dövlət başçısı Pyotr Poroşenkoya səs verəcəyini bildirib.
Yuliya Timoşenko sorğuda 14,8 faiz, Yuri Boyko 9,6 faiz, Anatoli Qritsenko 8,2 faiz, Oleq Lyaşko 4,8 faiz səs yığıb. Onların hamısı Ali Radanın deputatıdır.
Prezidentliyə 39 nəfər iddia edir. İlk turda qələbə üçün 50 faizdən çox səs toplamaq tələb olunur.
1965-ci il təvəllüdlü Pyotr Poroşenko 2014-cü il mayın 25-də Ukrayna prezidenti seçilib, iyunun 7-də səlahiyyətlərinin icrasına başlayıb.
Pyotr Poroşenko əvvəllər “Ukrprominvest” konserninin baş direktoru, Ukrayna Milli Bankı Şurasının sədr müavini, sədri olub, Milli Təhlükəsizlik və Müdafiə Şurasının katibi, xarici işlər naziri, iqtisadi inkişaf və ticarət nazir postlarını tutub.
1998, 2002, 2006 və 2012-ci illərin parlament seçkilərində deputat mandatı alıb.
