Prezident Qarabağ dəvətini qəbul etmədi
Ermənistan prezidenti Armen Sərkisyan Azərbaycanın Dağlıq Qarabağ bölgəsinə səfər etmək təklifinə razılaşmayıb. Novator.az-ın məlumatına görə, prezidentin mətbuat xidmətinin 12 mart açıqlamasında qeyd olunur ki, dövlət başçısı Ermənistan Təhlükəsizlik Şurasının Dağlıq Qarabağda keçiriləcək iclasına martın 11-i gecə dəvət alıb, ancaq texniki səbəblərdən toplantıda iştirak edə bilməyəcək.
Ermənistan Təhlükəsizlik Şurasına baş nazir sədrlik edir. Quruma baş nazirin müavinləri, şuranın katibi, müdafiə və xarici işlər nazirləri, Milli Təhlükəsizlik Xidmətinin, Ermənistan Polisinin və Silahlı Qüvvələrin Baş Qərargahının rəisləri daxildir.
Ermənistanın baş naziri Nikol Paşinyan martın 11-dən Dağlıq Qarabağdadır. Martın 12-si Xankəndidə Ermənistan Təhlükəsizlik Şurasının və işğalçı rejimin eyni strukturunun birgə iclası keçirilməlidir.
1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib. 1994-cü ildə atəşkəslə dayanan işğalçı müharibədə Ermənistan Dağlıq Qarabağı (Xankəndi şəhəri, Şuşa, Xocalı, Xocavənd, Ağdərə rayonları) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) ələ keçirib.
