Prezident niyyətindən əl çəkdi
Əlcəzair prezidenti Əbdüləziz Buteflika beşinci dəfə dövlət başçısı olmaq niyyətindən əl çəkib.
Novator.az-ın məlumatına görə, martın 11-də xalqa müraciət edən dövlət başçısı növbəti prezident seçkisinə qatılmayacağını bildirib.
1937-ci il təvəllüdlü Əbdüləziz Buteflika 1999-cu ildən dörd dəfə prezident seçilib. Onun 2019-cu il aprelin 18-nə təyin olunmuş prezident seçkisində iştirak niyyəti xalqın etirazına səbəb olub, aksiyalar keçirilib.
11 mart müraciətində Əbdüləziz Buteflika prezident seçkisinin təxirə salındığını, hökumətin istefaya göndərildiyini bəyan edib. O deyib ki, yeni konstitusiya qəbul etmək və prezident seçkisini bundan sonra keçirmək gərəkdir.
Həmin gün istefaya göndərilən baş nazir Əhməd Yəhyanı Nurəddin Bəduyi əvəzləyib. Nurəddin Bəduyi daxili işlər, yerli özünüidarəetmə və ərazilər naziri postunu tuturdu.
