Həbsdə olan müsavatçı: “Bunu heç kimə bağışlamayacam”
Martın 11-də Bakı Ağır Cinayətlər Məhkəməsində Müsavat Partiyasının üzvü Azad Həsənova ittiham elan olunub.
Hakim İradə Həsənzadənin sədrliyi ilə keçirilən prosesdə ittiham aktını dövlət itthamçısı Pərviz Rzayev elan edib.
Azad Həsənov Cinayət Məcəlləsinin 234.4.3-cü (qabaqcadan əlbir olan bir qrup şəxsin və ya mütəşəkkil dəstənin qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlaması, istehsal etməsi, saxlaması, daşıması, göndərməsi və ya satması) maddəsi ilə ittiham olunur. Bu maddə əmlakın müsadirəsi ilə 5 ildən 12 ilədək həbs cəzası nəzərdə tutur.
2003-cü ildən Müsavat Partiyasının üzvü olan Azad Həsənov 2014-cü ilin fevralında Azərbaycandan mühacirət edib və ailəsi ilə birgə Litvadan siyasi sığınacaq alıb. 2018-ci il oktyabrın 10-da o, ağır xəstə olan atasına baş çəkmək üçün Azərbaycana gəlib. Həmin gün Bakıda tutulub, oktyabrın 12-də Xətai Rayon Məhkəməsi onun barəsində həbs qətimkan tədbiri seçib.
Məhkəmə prosesində Azad Həsənov ittihamın tam uydurma olduğunu, üzərindən tapılan narkotiki əslində polislərin onun cibinə atdığını iddia edib.
Meydan.tv-nin məlumatına görə, Azad Həsənov bildirib ki, heç vaxt narkotik görməyib, heç siqaret də çəkə bilmir. O qeyd edib ki, tutularkən polis idarəsində psixoloji təzyiqlə üzləşib, döyülməmək, xəstə atasının narahatlığına səbəb olmamaq üçün narkotiki qəbiristanlıqdan tapıb özündə saxlaması barədə izahatı imzalamaq məcburiyyətində qalıb.
“İttihamın yalan olduğunu sübut etmək 5 dəqiqəlik işdir. Amma mən 5 aydır həbsdəyəm. Bunu heç kimə bağışlamayacam” deyən Müsavat fəalı həbsini siyasi fəallığı ilə əlaqələndirib.
Məhkəmə prosesi martın 18-də davam edəcək.
