Bakı finalının yolu açıldı
Prezident İlham Əliyev UEFA Avropa Liqasının final oyununun Bakıda keçirilməsi ilə bağlı gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsinə sərəncam verib. Sərəncama görə, bu sənədlərdən hər hansı birini təqdim edən əcnəbilər və vətəndaşlığı olmayan şəxslər 2019-cu il mayın 15-dən iyunun 1-dək Azərbaycanın beynəlxalq hava limanlarında viza ala bilərlər: Azərbaycan Futbol Federasiyaları Assosiasiyasının (AFFA) rəsmi dəvət məktubu; Avropa Futbol Assosiasiyaları Birliyinin (UEFA) müvafiq qaydalarına uyğun olaraq akkreditasiyadan keçməni təsdiq edən sənəd; final oyununa bilet və ya biletin əldə olunmasını təsdiq edən sənəd.
Final mayın 29-u Bakı Olimpiya Stadionunda olacaq. Bununla əlaqədar yaradılmış təşkilat komitəsinə baş nazirin birinci müavini Yaqub Eyyubov sədrlik edir.
Hazırda Avropa Liqasında mübarizəni “Çelsi”, “Dinamo” (Ukrayna), “Ayntraxt” (Frankfurt), “İnter” (İtaliya), “Dinamo” (Xorvatiya), “Benfika”, “Napoli”, “Zalsburq”, “Valensiya”, “Krasnodar”, “Sevilya”, “Slaviya”, “Arsenal” (London), “Renn”, “Zenit”, “Vilyarreal” komandaları davam etdirir.
