Hərbçi ali baş komandana dəstək verdi
Ukrayna prezidentliyinə iddiaçı Sergey Krivonos seçki yarışından çəkilib. Novator.az-ın məlumatına görə, Sergey Krivonos namizədliyini dövlət başçısı Pyotr Poroşenkonun xeyrinə geri götürüb.
Hərbçi, Donbas müharibəsinin iştirakçısı olan Sergey Krivonos bəyan edib ki, müharibə gedən ölkədə ali baş komandanı dəyişmək doğru qərar olmaz.
Ukraynada prezident seçkisi martın 31-də keçiriləcək. Dövlət başçısı postu uğrunda mübarizəyə Pyotr Poroşenko ilə yanaşı 43 nəfər qoşulub. Sonradan Lvov şəhərinin meri, Samopomoş Partiyasının lideri Andrey Sadovıy və İnsanların Gücü Partiyasının namizədi Dmitri Qnap Vətəndaş Mövqeyi Partiyasının lideri, deputat Anatoli Qritsenkonun xeyrinə geri çəkiliblər.
Rusiya 2014-cü ildə Ukraynanın Krım bölgəsini işğal edərək özünə birləşdirib, həmçinin Donetsk və Luqansk vilayətlərinin (Donbas bölgəsi) bir hissəsini işğal altında saxlayan separatçı rejimləri dəstəkləyir. Bu üç bölgədən 1,5 milyondan çox ukraynalı köçkün düşüb. Donbas bölgəsində 2014-cü ildən davam edən silahlı münaqişədə 10 mindən çox adam həlak olub.
Pyotr Poroşenko 2014-cü il mayın 25-də Ukrayna prezidenti seçilib, iyunun 7-də səlahiyyətlərinin icrasına başlayıb.
