Borcların tənzimlənməsi: layihədə nələr var?
Milli Məclis özəlləşdiriləcək dövlət əmlakının (müəssisələrinin) 2019-cu il martın 1-nə olan əmlak və torpaq vergiləri üzrə borclarının tənzimlənməsi qanununu ilk oxunuşda qəbul edib.
Qanunun 2019-cu il martın 1-dən qüvvəyə minməsi nəzərdə tutulur.
Novator.az bildirir ki, layihəyə görə, dövlət əmlakının (müəssisəsinin) satıcısı müvafiq orqan (qurum) ilə birlikdə özəlləşdirilməsi barədə qərar qəbul edilmiş dövlət əmlakının (müəssisəsinin) 1 mart 2019-cu ilə olan əmlak və torpaq vergiləri üzrə borclarını dəqiqləşdirməlidir. Özəlləşdirilən dövlət əmlakının (müəssisəsinin) qiymətləndirilməsi zamanı onun balans öhdəliklərində əks olunmuş debitor və kreditor borcları özəlləşdirmə planında (emissiya prospektində) ayrıca göstərilməlidir.
Özəlləşdirilməsi barədə qərar qəbul edilmiş dövlət əmlakına (müəssisəsinə) görə əmlak və torpaq vergiləri üzrə borclar bu qaydada tənzimlənir: dövlət əmlakının (müəssisələrinin) özəlləşdirildiyi tarixdən etibarən bir il ərzində bu borcların 30 faizi ödəndikdə – ödənməmiş borcların 70 faizi; borcların 50 faizi ödəndikdə – ödənməmiş borcların 50 faizi, üç il ərzində bu borcların 70 faizi ödəndikdə ödənməmiş borcların 30 faizi silinir.
Qanunun müddəaları dövlət əmlakının (müəssisələrinin) borclarının məcburi ödənməsi barəsində məhkəmə qərarı qəbul edilmiş, lakin ödənməmiş hissələrinə də şamil edilir.
