Xarici valyutada nə qədər kredit var?
Prezident İlham Əliyevin 28 fevral fərmanı fiziki şəxslərlə 2012-ci il yanvarın 1-dən bağlanmış kredit müqavilələri üzrə gecikən borclara görə devalvasiya kompensasiyaları nəzərdə tutur.
2015-ci il fevralın 21-də Mərkəzi Bank dolların rəsmi kursunu 0,7862 manatdan 1,05 manata qaldırıb. Dekabrın 21-də Mərkəzi Bank ikinci devalvasiyaya qərar verib, rəsmi kurs 1,55 manat olub. Hazırda 1 dollar 1,7 manata təklif edilir.
28 fevral fərmanına əsasən, 2015-ci il fevralın 21-nə xarici valyutada olan əsas kredit borcu üzrə 1 ABŞ dollarına 25 qəpik, həmin il dekabrın 21-nə xarici valyutada əsas kredit borcu üzrə 1 ABŞ dollarına 60 qəpik kompensasiya ödənəcək.
Novator.az bildirir ki, 2015-ci ildə devalvasiya olmamış Mərkəzi Bank xarici valyutada kreditləri 5 milyard 18,4 milyon manat həcmində göstərib. Bunun 204,4 milyon manatı vaxtı keçmiş kredit olub.
Devalvasiyadan sonra xarici valyutada kreditlərin həcmi 8 milyard 377,8 milyon manata çatıb. Problemli kreditlərdə də artım olub: 314,5 milyon manat.
2015-ci ilin sonuna xarici valyutada kreditlərin həcmi 10 milyard 735,9 milyon manata, onun problemli hissəsinin həcmi 668,3 milyon manata yüksəlib.
2016-cı il 7 milyard 781,4 milyon manat xarici valyutada kreditlə yekunlaşıb, problemli hissənin həcmi 790,2 milyon manat həddində qərarlaşıb.
2017-ci ilin sonunda xarici valyutada kreditlərin həcmi 4 milyard 804,2 milyon manata düşüb, onun problemli hissəsinin 837,5 milyon manat olduğu açıqlanıb.
2019-cu ilin yanvarın 1-nə xarici valyutada 4 milyard 946,7 milyon manat kredit olub. Bunun 810,9 milyon manatı problemli kreditdir.
2015-ci ilin əvvəlində ümumən problemli kreditlər 976,3 milyon manat həcmində göstərilib.
2016-cı ilin əvvəlində göstərici 1 milyard 508,5 milyon manat, 2017-ci ilin əvvəlində 1 milyard 472,6 milyon manat, 2018-ci ilin əvvəlində 1 milyard 626,7 milyon manat olub.
2019-cu il yanvarın 1-nə ödəniş vaxtı keçmiş kreditlər 1 milyard 585 milyon manat həddində rəsmiləşib.
