Paytaxtın sosial-iqtisadi göstəriciləri
Bakı Şəhər Statistika İdarəsi yeni göstəricilər açıqlayıb. Novator.az bildirir ki, rəsmi hesabata görə, 2019-cu ilin yanvarında sənayedə istehsalın və göstərilmiş xidmətlərin həcmi əvvəlki ilin ilk ayı ilə müqayisədə 2,9 faiz artaraq 3,2 milyard manata çatıb. Sənayedə qeyri-dövlət sektorunun payı 83,6 faiz olub.
Açıqlamaya görə, yanvarda paytaxtın iqtisadi və sosial sahələrinin inkişafı üçün əsas kapitala 503,3 milyon manat və ya əvvəlki ilin il ayı ilə müqayisədə 25,5 faiz az vəsait yönəldilib. Ümumi sərmayənin 37,3 faizi dövlət, 62,7 faizi qeyri-dövlət sektorunun sərmayədarlarının payına düşüb.
Qeyd olunur ki, yanvar ayında ticarət dövriyyəsinin həcmi 2018-ci ilin ilk ayı ilə müqayisədə 3,5 faiz, iaşə dövriyyəsi real ifadədə 4,2 faiz, ödənişli xidmətlərin dəyəri 0,9 faiz artıb.
Bakı Şəhər Statistika İdarəsi bildirir ki, 2018-ci ilin yanvar-dekabr aylarında işçilərin orta aylıq nominal əməkhaqqı əvvəlki ilə nisbətən 0,3 faiz artaraq 788,1 manata çatıb.
