Azərbaycandan Rusiyaya gedən mikroavtobus qəzaya uğrayıb
Martın 6-sı Azərbaycandan Rusiya paytaxtı Moskvaya gedən mikroavtobus Rusiyanın Stavropol diyarının Nevinnomıssk şəhəri yaxınlığında qəzaya uğrayıb.
Nəticədə 6 nəfər həlak olub, 3 nəfər yaralanıb. “Report” agentliyi onların hamısının Ağcabədi rayonundan olduğunu xəbər verir.
Məlumatda həlak olanların adları da göstərilir: 1962-ci il təvəllüdlü Namiq Tohid oğlu Əhmədov, 1969-cu il təvəllüdlü Ələmdar Niftalı oğlu Abdullayev, 1975-ci il təvəllüdlü Rəsul Ənvər oğlu Həsənov, 1983-cü il təvəllüdlü Şəmsi Tanrıverdi oğlu İsmayılov, 1984-cü il təvəllüdlü Vüsal Alı oğlu Quliyev və 1988-ci il təvəllüdlü Xəyal Hamlet oğlu Şirinov.
Yaralılar Nevinnomısk xəstəxanasının reanimasiya şöbəsinə yerləşdirilib. Onların vəziyyətinin ağır olduğu bildirilir.
Virtualaz.org-un məlumatına görə, “Mercedes Vito” markalı mikroavtobus “ZİL” markalı yük avromobili ilə toqquşub.
Rusiya Daxili İşlər Nazirliyinin Stavrapol diyarında yol hərəkətinin təhlükəsizliyinə cavabdeh olan baş idarəsinin rəisi polkovnik Aleksey Safonov qəzaya “ZİL”i sürən şəxsin sükan arxasında yuxulamasının səbəb ola biləcəyini söyləyib: “Böyük ehtimalla yük avtomobilinin sürücüsü sükan arxasında yuxulayıb, nəticədə “ZİL” qarşı hərəkət zolağına, mikroavtobusun yoluna çıxıb”.
