Yeni görüş anonsu
Dağlıq Qarabağ münaqişəsinin dinc həlli ilə məşğul olan ATƏT-in Minsk qrupunun həmsədrləri Endrü Skofer (ABŞ), Stefan Viskonti (Fransa), İqor Popov (Rusiya) bölgəyə səfərlərinin nəticələri ilə bağlı bəyanat yayıblar.
Həmsədrlər, o cümlədən ATƏT sədrinin xüsusi nümayəndəsi Anjey Kasprşik fevralın 20-si Yerevanda Ermənistanın baş naziri Nikol Paşinyanla, fevralın 21-i Bakıda Azərbaycan prezidenti İlham Əliyevlə görüşlər keçiriblər. Görüşlərdə Dağlıq Qarabağ münaqişəsinin həlli ilə bağlı danışıqların hazırkı vəziyyəti və perspektivləri ətrafında fikir mübadiləsi aparılıb.
Novator.az-ın məlumatına görə, həmsədrlərin martın 1-də yaydığı bəyanatda qeyd olunur ki, səfərləri zamanı aparılan danışıqlarda həm Nikol Paşinyan, həm də İlham Əliyev tezliklə görüşməyə razılıq veriblər.
Bəyanatda cəbhə xəttindəki sakitlikdən, itkilərin olmamasından məmnunluq ifadə edilir.
1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün hərbi təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ildə atəşkəslə dayanan müharibədə Ermənistan Dağlıq Qarabağ bölgəsini (Xankəndi şəhəri, Şuşa, Xocalı, Xocavənd, Ağdərə rayonları) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları), eləcə də Qazax rayonunun 7, Naxçıvan Muxtar Respublikasının 1 kəndini işğal edib. 25 ildir aparılan sülh danışıqları heç bir nəticə vermir.
Dağlıq Qarabağ münaqişəsinin dinc yolla tənzimləməsi üçün 1992-ci ildə yaradılan ATƏT-in Minsk qrupunda ABŞ, Fransa, Rusiya ilə yanaşı Belarus, Almaniya, İtaliya, İsveç, Finlandiya, Türkiyə, Ermənistan, Azərbaycan da təmsil olunur.
Ermənistan hökumətinə 2018-ci il mayın 8-dən başçılıq edən Nikol Paşinyan Azərbaycan prezidenti İlham Əliyevlə sentyabrın 28-i Tacikistanın paytaxtı Düşənbədə, dekabrın 6-sı Rusiyanın Sankt-Peterburq şəhərində, bu il yanvarın 22-si İsveçrənin Davos şəhərində danışıqlar aparıb.
