Fəxrəddin Abbasov Azərbaycana gətirilib
Martın 1-də Dövlət Təhlükəsizliyi Xidmətinin ictimai əlaqələr şöbəsi rəsmi məlumat yayıb. Məlumatda deyilir: “Dövlət Təhlükəsizliyi Xidmətində istintaqı aparılan cinayət işi üzrə Azərbaycan Respublikasının vətəndaşı Abbasov Fəxrəddin Fərman oğlu Cinayət Məcəlləsinin 281.2 (Dövlət əleyhinə yönələn açıq çağırışlar) və 283.1-ci (Milli, irqi nifrət və düşmənçiliyin salınması, milli ləyaqətin alçaldılması) maddələrində nəzərdə tutulan cinayət əməllərini törətməkdə şübhəli bilinərək təqsirləndirilən şəxs kimi məsuliyyətə cəlb edilib. Səbail Rayon Məhkəməsinin 14 iyul 2018-ci il qərarı ilə Abbasov Fəxrəddin Fərman oğlunun barəsində həbs qətimkan tədbiri seçilib.
Abbasov Fəxrəddin Fərman oğlu Rusiya Federasiyasında müvəqqəti yaşamaq hüququ müddətinin bitməsi ilə əlaqədar Moskva vilayətinin Lübertsi Şəhər Məhkəməsinin deportasiya haqqında qərarı icra olunarkən 28 fevral 2019-cu ildə Bakının beynəlxalq hava limanında saxlanıb və istintaqa cəlb edilib.
Hazırda Abbasov Fəxrəddin Fərman oğlunun Ermənistan Respublikasına səfərləri, özünün də bildirməsinə görə Ermənistan xüsusi xidmət orqanı əməkdaşı ilə apardığı görüş və əlaqələrinin mahiyyəti, Ermənistan Respublikasında keçirilən və kütləvi informasiya vasitələrində, sosial şəbəkələrdə yayımlanan tədbirlərə canlı yayımda qoşularaq Azərbaycan Respublikası və onun ərazi bütövlüyü əleyhinə etdiyi çağırışlar və digər əlaqəli məsələlərlə bağlı istintaq araşdırmaları davam etdirilir”.
Fəxrəddin Abbasov ötən il sentyabrın 6-da Rusiyanın Moskva vilayətində tutulmuş, sentyabrın 7-də Lüberets Şəhər Məhkəməsinin onun haqqında həbs qətimkan tədbiri seçdiyi və Azərbaycana təhvil verilməsi məsələsinə baxılacağı açıqlanmışdı.
1956-cı ildə Lerik rayonunda anadan olan Fəxrəddin Abbasov 1993-cü ildən talışların milli hüquqlarını qorumaq adı altında Azərbaycanın ərazi bütövlüyünə qarşı davamlı çağırışları ilə tanınıb.
