Qalmaqal Ukraynanı “Avroviziya”sız qoydu
Ukrayna “Avroviziya 2019” mahnı müsabiqəsində iştirak etməyəcək. Novator.az-ın məlumatına görə, qərarı Ukrayna Milli İctimai Teleradio Şirkəti fevralın 27-də açıqlayıb.
Bu həftə yerli seçim turunun qalibi olmuş müğənni Anna Korsunla bağlı qalmaqal yaranıb. Müğənni Ukrayna Milli İctimai Teleradio Şirkətinin təklif etdiyi müqavilənin şərti – ölkənin torpaqlarını işğal edən Rusiyaya qastrola getməmək təklifi ilə razılaşmayıb və müsabiqədən boyun qaçırıb. Milli seçim turunun digər finalçıları onu əvəz etmək istəmədiyi üçün Ukrayna Milli İctimai Teleradio Şirkəti müsabiqəyə qatılmamaq qərarına gəlib.
Ukrayna “Avroviziya” yarışmalarında 2003-cü ildən iştirak edib, 2004 və 2016-cı illərdə müsabiqənin qalibi olub.
Mayın 14-dən 18-dək İsrailin Tel-Əviv şəhərində keçiriləcək yarışmada 41 ölkə, o cümlədən Azərbaycan iştirak edəcək.
1956-cı ildən keçirilən “Avroviziya” yarışı ictimai teleradioları cəmləşdirən Avropa Yayım Birliyinin layihəsidir. Azərbaycan “Avroviziya”ya 2008-ci ildən qatılır.
Səidə Hüseynova
