Həm alındı, həm də yox
ABŞ prezidenti Donald Trampla Şimali Koreyanın ali rəhbəri Kim Çen İnin Vyetnamın paytaxtı Hanoyda keçirilən görüşləri gözlənən nəticələri verməyib. Dövlət başçıları fevralın 27-si “Sofitel Legend Metropole” mehmanxanasında danışıq aparıblar. Fevralın 28-i eyni məkanda təkbətək və geniş tərkibdə yeni görüşlər olub.
Novator.az-ın məlumatına görə, Ağ evin sözçüsü Sara Sanders sammitin konstruktiv ruhda keçdiyini, müəyyən nəticələr verdiyini, ancaq hər hansı yekun razılaşmaya gətirmədiyini bəyan edib.
İki liderin danışıqlardan sonra birgə sənəd imzalayacağı açıqlanmışdı. Donald Tramp jurnalistlərə deyib ki, Şimali Koreya ABŞ-ın tətbiq etdiyi sanksiyaların ləğvi müqabilində tələb olunan addımları gerçəkləşdirməyə razılaşmayıb.
ABŞ-la Şimali Koreya ötən əsrin 50-ci illərindən bir-birinə düşmən mövqedə olublar. Münasibətlərdə nisbi yumşalma Şimali Koreya rejiminin nüvə sınaqlarından imtina etməsindən sonra yaranıb. Donald Trampla Kim Çen İn ötən il iyunun 12-si Sinqapurda bir araya gəliblər. Bu, ABŞ və Şimali Koreya dövlət başçılarının tarixdə ilk görüşü olub. Həmin gün imzalanan birgə sənəd ABŞ-ın Şimali Koreyaya təhlükəsizlik təminatı verməsini, Şimali Koreyanın isə bunun əvəzində nüvə silahlarından tam imtina etməsini, iki ölkə arasında münasibətlərin qurulmasını nəzərdə tutur.
