Türkiyə Böyük Millət Məclisinin yeni sədri kimdir?
Ədalət və İnkişaf Partiyasından millət vəkili Mustafa Şentop fevralın 24-də Türkiyə Böyük Millət Məclisinin sədri seçilib.
Novator.az bildirir ki, 1968-ci il təvəllüdlü Mustafa Şentop İstanbul və Mərmərə universitetlərində hüquq təhsili alıb. 1993-cü ildən Mərmərə Universitetində dərs deyib, professor elmi dərəcəsinə qədər yüksəlib.
İqtisadi və Sosial Araşdırmalar Mərkəzinin İstanbul şöbəsinə başqanlıq edib, Ədalət və İnkişaf Partiyası sədrinin müavini postunu tutub. 2011-ci ildən parlamentin deputatıdır. 2018-ci ildən parlament sədrinin müavini idi.
İngilis və ərəb dillərini bilir.
Evlidir, 4 övladı var.
Parlamentin əvvəlki sədri Binəli Yıldırım martın 31-də keçiriləcək bələdiyyə seçkilərinə qatıldığı üçün istefa verib. O, ötən il iyulun 12-də Türkiyə Böyük Millət Məclisinə sədr seçilmişdi.
1955-ci il təvəllüdlü Binəli Yıldırım Ədalət və İnkişaf Partiyasının qurucularındandır. 2002-ci ildən bütün hökumətlərdə təmsil olunub, 2016-2018-ci illərdə baş nazir postunu tutub. Sabiq spiker 31 mart seçkisində Ədalət və İnkişaf Partiyası ilə Milliyyətçi Hərəkat Partiyasının qurduğu Xalq ittifaqından İstanbul bələdiyyəsinin sədri postuna namizəddir.
İndi parlamentdə Ədalət və İnkişaf Partiyasının 291, Cümhuriyyət Xalq Partiyasının 142, Xalqların Demokratik Partiyasının 65, Milliyyətçi Hərəkat Partiyasının 49, Yaxşı Partiyanın 39, Səadət və Türkiyə Fəhlə partiyalarının hərəyə 2, Böyük Birlik və Demokrat partiyalarının hərəyə 1 mandatı var. 3 deputat partiyasızdır.
