Türkiyə klubları ələndi
UEFA Avropa Liqasında 1/16 final başa çatıb. Novator.az-ın məlumatına görə, Türkiyənin “Qalatasaray” komandası fevralın 21-i Portuqaliyada “Benfika”nın qonağı olub. Qolsuz bitən matç meydan sahiblərini növbəti raunda çıxarıb. Türklər ilk matçda 1:2 hesabı ilə uduzmuşdular.
Rusiyada “Zenit”lə üz-üzə gələn digər Türkiyə komandası “Fənərbaxça” 1:3 hesabı ilə yenilərək turnirdən ələnib. İlk oyunda ruslar minimal fərqlə yenilmişdi – 0:1.
1/8 finalda “Benfika” və “Zenit”lə yanaşı “Ayntraxt” (Frankfurt), “Dinamo” (Ukrayna), “Arsenal” (London), “Krasnodar”, “Dinamo” (Xorvatiya), “Zalsburq”, “İnter” (İtaliya), “Slaviya”, “Napoli”, “Çelsi”, “Valensiya”,“Renn”, “Sevilya”, “Vilyarreal” klubları da çıxış edəcək.
UEFA-nın klub turnirlərində 12 ölkənin 32 komandası (Çempionlar Liqasında 16, Avropa Liqasında 16 klub) qalır. Hazırda İspaniya və İngiltərə 6, İtaliya və Almaniya 4, Fransa 3, Portuqaliya və Rusiya 2, Ukrayna, Avstriya, Çexiya, Hollandiya, Xorvatiya 1 komanda ilə təmsil olunur.
