Dustaqlar və illər
Bir qrup hüquqşünas, jurnalist və hüquq müdafiəçisinin birləşdiyi Siyasi Məhbusların Vahid Siyahısı üzrə İşçi Qrup 127 nəfəri siyasi məhbus sayır. Novator.az bildirir ki, siyahının jurnalist və bloqçular bölümündən Nicat Əliyev və Araz Quliyev 2012-ci ildən, Rəşad Ramazanov 2013-cü ildən, Seymur Həzi 2014-cü ildən , Fikrət Fərəməzoğlu 2016-cı ildən, Elçin İsmayıllı, Mehman Hüseynov, Əfqan Muxtarlı və Ziya Əsədli 2017-ci ildən həbsdədirlər.
Şair Tofiq Həsənli 2015-ci ildə, hüquq müdafiəçisi Əliabbas Rüstəmov 2014-cü ildə tutulublar.
Siyasi və ictimai fəallardan İlkin Rüstəmzadə 2013-cü ildə, Asif Yusifli 2014-cü ildə, Fuad Qəhrəmanlı 2015-ci ildə, Qiyas İbrahimov, Bayram Məmmədov, Elgiz Qəhrəman və Fuad Əhmədli 2016-cı ildə, Gözəl Bayramlı və Əlikram Xurşidov 2017-ci ildə, Orxan Baxışlı, Mirfeyzulla Seyidov, Saleh Rüstəmov, Vidadi Rüstəmli, Aqil Məhərrəmov, Babək Həsənov, Ruslan Nəsirov, Azad Həsənov və Əbülfəz Sadıqbəyli 2018-ci ildə həbs ediliblər.
İnanclı fəallardan Mövsüm Səmədov, Rufulla Axundzadə, Fəramiz Abbasov və Abgül Süleymanov 2011-ci ildən, Taleh Bağırov 2015-ci ildən dustaqdırlar.
Ömürlük həbs cəzasına məhkum olunan keçmiş Xüsusi Təyinatlı Polis Dəstəsinin üzvləri Elçin Əmiraslanov, Arif Kazımov və Səfa Poladov 1996-cı ildə tutulublar.
Sabiq səhiyyə naziri Əli İnsanov 2005-ci ildən, keçmiş prokurorluq işçisi Rüfət Səfərov 2016-cı ildən həbsdədirlər.
AXCP sədri Əli Kərimlinin qayını Elnur Seyidov 2012-ci ildə, jurnalist Natiq Ədilovun qardaşı Murad Ədilov 2014-cü ildə tutulublar.
Səid Dadaşbəyli və onunla birgə tutulan Rəşad Əliyev, Fərid Ağayev, Ceyhun Əliyev, Cahangir Kərimov, Samir Qocayev, Rasim Kərimov, Bəybala Quliyev 2007-ci ildən məhbəsdədirlər.
Avropa Şurasının meyarlarına görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
