Sərmayənin həcmi, detallar
2019-cu ilin yanvarında xarici müəssisə və təşkilatlar əsas kapitala 290,5 milyon manat vəsait yönəldib. Novator.az-ın məlumatına görə, Dövlət Statistika Komitəsi bildirir ki, həmin vəsaitin 90,9 faizi Böyük Britaniya, Türkiyə, Çexiya, İsveçrə, Malayziya, ABŞ, Yaponiya, İran və Rusiya sərmayədarlarına məxsus olub.
Ümumilikdə ötən ay ölkənin iqtisadi və sosial sahələrinin inkişafına 868,7 milyon manat və ya əvvəlki ilin yanvarı ilə müqayisədə 12,5 faiz az vəsait qoyulub. Sərmayənin 21,9 faizi dövlət, 78,1 faizi qeyri-dövlət sektorunun payına düşüb.
Əsas kapitala yönəldilmiş sərmayədə müəssisə və təşkilatların vəsaitləri 731 milyon manat, bank kreditləri 43,9 milyon manat, büdcə vəsaitləri 35,6 milyon manat, büdcədənkənar fondların vəsaitləri 7 milyon manat, əhalinin şəxsi vəsaitləri 51 milyon manat, sair vəsaitlər 0,2 milyon manat təşkil edib.
Vəsaitin 50,2 faizi sənaye, 21,6 faizi tikinti, 10,2 faizi nəqliyyat və anbar təsərrüfatı, 5 faizi kənd təsərrüfatı, meşə təsərrüfatı və balıqçılıq, 3,8 faizi turistlərin yerləşdirilməsi və ictimai iaşə, 2,9 faizi dövlət idarəetməsi və müdafiə; sosial təminat, 2,7 faizi peşə, elmi və texniki fəaliyyət, 1,9 faizi səhiyyə, 1 faizi ticarət; nəqliyyat vasitələrinin təmiri, 0,4 faizi informasiya və rabitə, hər birində 0,1 faiz olmaqla maliyyə və sığorta fəaliyyəti, inzibati və yardımçı xidmətlərin göstərilməsi, təhsil sahələrinə sərf olunub.
