Naxçıvanda orta maaş 433 manata çatıb
2019-cu ilin yanvarında Naxçıvan Muxtar Respublikasında 168,3 milyon manatlıq ümumi daxili məhsul (ÜDM) istehsal olunub, bu da 2018-ci ilin ilk ayı ilə müqayisədə 0,4 faiz çoxdur. Hər bir nəfərə düşən ÜDM-in həcmi 368,9 manat göstərilir.
Muxtar respublikanın Dövlət Statistika Komitəsi bildirir ki, sənayedə 0,9 faiz, kənd təsərrüfatında 3 faiz artım var.
Yanvar ayında muxtar respublikada əsas kapitala 36,7 milyon manat vəsait yönəldilib.
İnformasiya və rabitə xidmətlərinin dəyəri 2018-ci ilin müvafiq dövründəki xidmətlərin dəyəri ilə müqayisədə 2 faiz artıb.
Ötən ay muxtar respublikanın bank və kredit təşkilatları hüquqi və fiziki şəxslərə 3,1 milyon manat məbləğində kreditlər verib, bu da bir il öncəki göstəricidən 28,2 faiz çoxdur.
Muxtar respublikada 383 növdə məhsul istehsal olunur, bunun da 126 növü ərzaq, 257 növü qeyri-ərzaq məhsullarıdır. 350 növdə məhsula olan tələbatı tamamilə yerli imkanlar hesabına ödənir.
Yanvar ayında 29,7 milyon ABŞ dolları dəyərində xarici ticarət dövriyyəsi qeydə alınıb. İxracın dəyəri 23,9 milyon ABŞ dolları təşkil edib.
2018-ci ildə muxtar respublika iqtisadiyyatında bir işçiyə hesablanmış orta aylıq əməkhaqqı 433 manat təşkil edib, bu da 2017-ci illə müqayisədə 3,1 faiz çoxdur.
