Müsavatçı gəncin işi: zərərçəkmiş iddiasından imtina etdi
“Nikoyl” İnvestisiya Kommersiya Bankı zərərçəkmiş kimi tanındığı məhkəmə işində mülki iddiasından imtina edib, məhkəməyə təqsirləndirilən şəxslərdən şikayətçi, onlardan tələbinin olmadığı barədə ərizə göndərib.
“Nikoyl” bankının zərərçəkmiş kimi tanındığı işdə təqsirləndirilən şəxslər Müsavatçı Gənclər Təşkilatının sədri Əbülfəz Sadıqbəyli, onun əmisi oğlu Asif Sadıqov və vaxtilə “Nikoyl” bankının Qaradağ filialının hüquqşünası olmuş Kamran Abbasovdur.
İstintaq 2018-ci ilin noyabrında Əbülfəz Sadıqbəyli barəsində həbs qətimkan tədbiri seçib. Asif Sadıqov və Kamran Abbasov isə azadlıqdadırlar.
Qaradağ Rayon Məhkəməsi işi dələduzluq və saxta sənəd hazırlayıb ondan istifadə etmək ittihamı ilə aparır. İttihama əsasən, Əbülfəz Sadıqbəyli yol polisinə “Nikoyl” bankının krediti ilə aldığı “Niva” markalı avtomobilə görə borclu qaldığı pulun ödənməsi barədə bankın Qaradağ filialından saxta arayış təqdim edərək maşını öz mülkiyyətinə keçirib, daha sonra satıb.
Müsavat Partiyası iddia edir ki, Əbülfəz Sadıqbəyli siyasi motivlərlə təqib olunur.
Fevralın 19-da “Nikoyl” bankından Qaradağ Rayon Məhkəməsinin hakimi Fuad Hüseynova göndərilən məktubda deyilir ki, banka vurulmuş 6251 ABŞ dolları məbləğində maddi ziyan tam ödənib və bankın təqsirləndirilən şəxslərə qarşı heç bir iddiası və tələbi yoxdur. Bu səbəbdən də bank təqsirləndirilən şəxslərə təyin olunacaq cəzanı məhkəmənin mülahizəsinə buraxdığını qeyd edib.
