Milliyyətçi Gənclər Təşkilatı İdarə Heyətinin üzvü həbs olunub
Milliyyətçi Gənclər Təşkilatı (MGT) İdarə Heyətinin üzvü Zakir Kərimli həbs edilib.
MGT üzvlərinin Toplum.tv-yə verdikləri məlumata görə, Zakir Kərimlini fevralın 19-u səhər təhsil aldığı Dövlət İdarəçilik Akademiyasında bir neçə mülki geyimli şəxs tutaraq aparıb.
MGT İdarə Heyətinin üzvü Müşfiq Vəliyev “Facebook” səhifəsində yazıb ki, hadisədən bir neçə saat sonra onlar Zakir Kərimlininin Yasamal rayonu ərazisindəki polis bölmələrinin birində saxlandığını öyrəniblər. Daha sonra isə Yasamal Rayon Məhkəməsinin qərarı ilə Zakir Kərimli inzibati qaydada 15 sutkalığa həbs olunub. Onun nədə təqsirli bilindiyi haqda məlumat yayılmayıb.
Müşfiq Vəliyev bu həbsi Zakir Kərimlinin ideoloji baxışı ilə əlaqələndirir: “Müşfiqi çoxdan qaralamışdılar – həm oxuduğu təhsil ocağında, həm də kənarda. Onun həbsinin sifarişli olduğunu düşünürük”.
