Cəbhəçilərə cəzalar təklif olunub
AXCP Ali Məclisi Rəyasət Heyətinin üzvü Aqil Məhərrəmli, partiyanın Nərimanov rayon şöbəsinin sədri Babək Həsənov, Gənclər Komitəsi Məclisinin sədri Ruslan Nəsirli, Gədəbəy Rayon İcra Hakimiyyətinin keçmiş başçısı Saleh Rüstəmov və onun qardaşı oğlu Vidadi Rüstəmlinin məhkəməsi finiş xəttinə çıxıb.
Novator.az bildirir ki, 1992-1993-cü illərdə – Azərbaycan Xalq Cəbhəsinin hakimiyyəti vaxtı Gədəbəy Rayon İcra Hakimiyyətinin başçısı vəzifəsində çalışmış, 1997-ci ildən Rusiyada yaşayan iş adamı Saleh Rüstəmov 2018-ci ilin mayında qohumunun yas mərasimində iştirak etmək üçün Gədəbəyə gəlib. Mayın 8-də o, Rusiyaya qayıtmaq üçün Gədəbəydən Bakıya yola düşərkən Şəmkir yaxınlığında, qardaşı oğlu Vidadi Rüstəmli ilə birgə tutulub.
Mayın 25-də bu iş üzrə Aqil Məhərrəmli, Babək Həsənov və Ruslan Nəsirli də tutulublar.
Həbs edilənlər əsasən qanunsuz sahibkarlıqda, pul vəsaitlərini qanunsuz leqallaşdırmaqda təqsirləndirilirlər. İttihama görə, Saleh Rüstəmov AXCP-ni qanunsuz maliyyələşdirib, tutulan digər şəxslər bu işdə ona yardımçı olublar.
Mühakimə prosesi 2019-cu ilin yanvarında Bakı Ağır Cinayətlər Məhkəməsində başlanıb. Azadliq.org xəbər verir ki, fevralın 19-da keçirilən prosesdə məhkəmə istintaqının yekunlaşdığı bəyan olunub. Prokuror Saleh Rüstəmova 8 il 6 ay, Babək Həsənov və Aqil Məhərrəmovun hər birinə 7 il 6 ay azadlıqdan məhrumetmə cəzası, Vidadi Rüstəmli ilə Ruslan Nəsirova isə 3 il 6 aylıq şərti cəzalar verilməsini istəyib. Məhkəmə fevralın 27-də vəkillərin müdafiə çıxışları ilə davam edəcək.
