Rusiya: hərbi hissələrə mobil qurğu yasağı qoyulur
Rusiya parlamentinin aşağı palatası – Dövlət Duması fevralın 19-da hərbi qulluqçuların və hərbi xidmətə çağırılan şəxslərin mobil qurğulardan istifadəsini məhdudlaşdıran qanun layihəsini qəbul edib.
Novator.az xəbər verir ki, qanun təklifinə görə, hərbçilərə və çağırışçılara hərbi hissələrin ərazisində, xidmət yerlərində üzərində informasiya yaddaşı və ya internetə qoşulma, videoyazı funksiyası olan telefon, planşet və sair qurğuları gəzdirmək yasağı qoyulur.
Yeni qadağa KİV-lərdə, messencerlərdə və ya sosial şəbəkələrdə hərbi xidmətlə, digər hərbçilərlə bağlı informasiyaları, vətəndaşların və onların ailə üzvlərinin hərbi xidmətdən tərxis olunması haqda istənilən məlumatı yaymağı da yasaqlayır.
Layihə müəllifləri hesab edir ki, xarici xüsusi xidmət orqanları, terror qurumları və ekstremist təşkilatlar hərbçilərin internetdə yerləşdirdiyi informasiyalardan yararlana bilər.
Səidə Hüseynova
